ବାସୁଦେବପୁର, ୨୫/୧୨: ବାସୁଦେବପୁର ବ୍ଲକ ଇରମ ଶହିଦ୍ ମେମୋରିଆଲ୍ ଉଚ୍ଚ ମାଧ୍ୟମିକ ବିଦ୍ୟାଳୟରେ ଗୁଣିଗାରେଡି ଆତଙ୍କ ଚରମ ସୀମାକୁ ପହଞ୍ଚିଛି। ବିଦ୍ୟାଳୟ ପରିସରରେ ମୁଖ୍ୟ ଶିକ୍ଷକ ଭୋଳାନାଥ ବାରିକଙ୍କ ତରଫରୁ ଗୁଣିଗାରେଡି କରାଯାଇଥିବା ଘଟଣା ସିସିଟିଭି ଫୁଟେଜରେ ଧରାପଡ଼ିବା ପରେ ଏହି ଘଟଣା ସମସ୍ତ ସୋସିଆଲ୍ ମିଡିଆରେ ଭାଇରାଲ୍ ହୋଇଛି।
ସିସିଟିଭି ଫୁଟେଜରେ ଦେଖାଯାଇଛି ଯେ ପ୍ରଧାନଶିକ୍ଷକ ଏବଂ ତାଙ୍କ ସ୍ତ୍ରୀ ନିଜ ସ୍ୱାର୍ଥ ସାଧନରେ ବିଦ୍ୟାଳୟ ପରିସରରେ ଗୁଣିଗାରେଡି କାର୍ଯ୍ୟ କରୁଛନ୍ତି। ଏହି କାର୍ଯ୍ୟରେ ତାଙ୍କ ଦ୍ବାରା ଲେମ୍ବୁ, ଗୁଆ, ପଇସା ଓ ଫୁଲ ବ୍ୟବହାର କରାଯାଇ ଏକ ଗାତ ଖୋଳାଯାଇଥିଲା। ଗୁଣିଗାରେଡିର ପରିଣାମରେ ବିଦ୍ୟାଳୟର କର୍ମଚାରୀ ତଥା ଛାତ୍ରଛାତ୍ରୀମାନଙ୍କ ମଧ୍ୟରେ ଭୟର ମହଲ ଦେଖାଯାଇଛି।
ଏହି ଘଟଣା ଘଟିବା ପରେ ବିଦ୍ୟାଳୟର ଡାଟା ଏଣ୍ଟ୍ରି ଅପରେଟର ନିତ୍ୟାନନ୍ଦ ବିଶ୍ୱାଳ ଆକସ୍ମିକ ଅସୁସ୍ଥ ହୋଇ ଏକ ଭୟାବହ ଅବସ୍ଥାରେ ଚିତ୍କାର କରୁଥିଲେ। ସମସ୍ତ କର୍ମଚାରୀ ଏହି ଘଟଣା ଦେଖି ତୁରନ୍ତ ସିସିଟିଭି ଫୁଟେଜ ଯାଞ୍ଚ କରି ମୁଖ୍ୟ ଶିକ୍ଷକଙ୍କ ଭୂମିକାକୁ ଉଜାଗର କରିଥିଲେ। ପଚାରାଯାଇଥିବା ବେଳେ ମୁଖ୍ୟ ଶିକ୍ଷକ ଏହି କାର୍ଯ୍ୟକୁ ସ୍ୱୀକାର କରି ନିଜକୁ ବିଦ୍ୟାଳୟରୁ ବଦଳି କରାଇବା ପାଇଁ ଏପରି ଦୃଷ୍ଟିଭ୍ରମ ସୃଷ୍ଟି କରିବା ନିୟତ ରହିଥିବା କହିଛନ୍ତି।
ସ୍ଥାନୀୟ ଅଞ୍ଚଳରେ ଏହି ଘଟଣା ନେଇ ସଭିଏଁ ଅସନ୍ତୋଷ ପ୍ରକାଶ କରିଛନ୍ତି। ଅନ୍ଧବିଶ୍ୱାସର ନାଁରେ ଗୁଣିଗାରେଡି ଜଣେ ଶିକ୍ଷକଙ୍କ ଦ୍ବାରା ହୋଇଥିବା ଏପରି ଘଟଣାକୁ ଅତ୍ୟନ୍ତ ନିନ୍ଦା କରାଯାଇଛି। ଏହା ଉପରେ ଉଚ୍ଚସ୍ତରୀୟ ତଦନ୍ତ ଏବଂ ପ୍ରଧାନ ଶିକ୍ଷକଙ୍କ ଉଚିତ କାର୍ଯ୍ୟବାହି ପ୍ରତି ଦାବି କରାଯାଇଛି।
