 |
ଗତକାଲି ଅପରାହ୍ନରେ ରାଜ୍ୟ ଖାଦ୍ୟ, ଯୋଗାଣ ଓ ଖାଉଟି କଲ୍ୟାଣ ମନ୍ତ୍ରୀ କୃଷ୍ଣଚନ୍ଦ୍ର ପାତ୍ର ଆଳି ବ୍ଲକର ଉଜାଡ଼ା ଫସଲ ଅବସ୍ଥା ଅନୁଧ୍ୟାନ କରିଥିଲେ। ମନ୍ତ୍ରୀ ଦିଗଛିଆ ଭେଡା, ମଧୁବନ, ଗୋବିନ୍ଦପୁର ଆଦି ଅଞ୍ଚଳରେ ପହଞ୍ଚି ଧାନକ୍ଷେତ ଦେଖି ଥିବା ବେଳେ କଳସପୁର, ଭୂଇଁପୁର, ସାନମଙ୍ଗ ଓ ଚଣ୍ଡିଆଗଡି ଗ୍ରାମର ଚାଷୀମାନେ ତାଙ୍କୁ ବେଢ଼ି ଜଣାଇଥିଲେ ତାଙ୍କ ଦୁରବସ୍ଥା।
ଧାନ ଉଜାଡ଼ି ଦେଖି ଭୋଭୋ କାନ୍ଦିଥିବା ଚାଷୀମାନେ ମନ୍ତ୍ରୀଙ୍କୁ କହିଛନ୍ତି, "ଆମ ଆହାର ମୁହଁରେ ପାହାର ହୋଇଗଲା। ଏହାକୁ ଠିକ କରନ୍ତୁ।" ପାଣିରେ ଭାସୁଥିବା ଧାନ ଫସଲ ଓ ଖଳାରେ ପଡ଼ିଥିବା ଧାନଗଜା ଦେଖାଇ ତାଙ୍କ ଦୁଃଖ ମନ୍ତ୍ରୀଙ୍କୁ ବିବରଣା କରିଛନ୍ତି।
ଫସଲ ଓ ଚାଷୀଙ୍କ ଦୁରବସ୍ଥା ଦେଖି, ମନ୍ତ୍ରୀ କୃଷ୍ଣଚନ୍ଦ୍ର ପାତ୍ର ତୁରନ୍ତ କ୍ଷତିପୂରଣ ବ୍ୟବସ୍ଥା କରାଯିବ ବୋଲି ଆଶ୍ୱାସନ ଦେଇଥିଲେ। ଏହି ଅବସ୍ଥା ଅନୁଧ୍ୟାନରେ ବିଜେପି ଜିଲ୍ଲା ସଭାପତି କିଶୋର ପଣ୍ଡା, ଉପସଭାପତି କୃଷ୍ଣଚନ୍ଦ୍ର ପଣ୍ଡା, ଜିଲ୍ଲା କୃଷକ ମୋର୍ଚ୍ଚା ସଭାପତି ଶ୍ରୀଧର ପ୍ରଧାନ ଓ ଅନ୍ୟମାନେ ସହଯୋଗ କରିଥିଲେ।
