ଝରିଗାଁ, ୯।୧୨: ମକା ମିଲିଂ ଦୂର୍ଘଟଣାରେ ଗୋଡ଼ ଗୁରୁତର ଭାବେ ଆହତ ହୋଇଥିବା ନବମ ଶ୍ରେଣୀର ଛାତ୍ର କୃଷ୍ଣଙ୍କ ଚିକିତ୍ସାଧୀନ ଅବସ୍ଥାରେ ବିଶାଖାପାଟଣାରେ ମୃତ୍ୟୁ ଘଟିଛି। ତାଙ୍କ ପରିବାର ମୃତଦେହକୁ ଗାଁକୁ ଆଣିଥିବା ବେଳେ ଶୋକର ଆବରଣ ସମୁଦାୟ ଉପରେ ପତିତ ହୋଇଛି।
ମିଳିଥିବା ସୂଚନା ଅନୁସାରେ, ରବିବାର କୃଷ୍ଣ ନିଜ ସମ୍ପର୍କୀୟଙ୍କ ସହିତ ମକା ମିଲିଂ କାମକୁ ଯାଇଥିଲେ। ଘର ଲୋକଙ୍କ ମନା କରିବା ସତ୍ତ୍ୱେ ସେ କାମକୁ ଯାଇଥିଲେ । ମକା ମିଲିଂ ବେଳେ ମେଶିନ ଜାମ ହେବାରୁ ସେ ଗୋଡ଼ଦ୍ୱାରା ମକା ଚାପି ତାହାକୁ ଚାଲୁ କରିବାକୁ ଚେଷ୍ଟା କରିଥିଲେ। ଯାହାଫଳରେ ମେଶିନରେ ତାଙ୍କ ଗୋଡ଼ ଫସି ଗୁରୁତର ଆହତ ହୋଇଥିଲା। ତାଙ୍କ ଡାହାଣ ଗୋଡ଼ରେ ହାଡ଼ ଓ ମାଂସ ଅଲଗା ହୋଇଯାଇଥିଲା।
ପରିବାର ଲୋକେ କୃଷ୍ଣକୁ ୧୦୮ ଆମ୍ବୁଲାନ୍ସ ଯୋଗେ ପ୍ରଥମେ ଝରିଗାଁ ସ୍ବାସ୍ଥ୍ୟ କେନ୍ଦ୍ରକୁ ନେଇଥିଲେ। ତାଙ୍କର ଅବସ୍ଥା ଗୁରୁତର ଥିବାରୁ ନବରଙ୍ଗପୁର ମୁଖ୍ୟ ଚିକିତ୍ସାଳୟ ଓ ପରେ ବିଶାଖାପାଟଣାକୁ ସ୍ଥାନାନ୍ତର କରାଯାଇଥିଲା। ତଥାପି ଚିକିତ୍ସା ବେଳେ ସେ ଜୀବନର ସଂଗ୍ରାମ ହାରିଗଲେ।
