ଭୁବନେଶ୍ୱର, ୧୦।୧୨: ଆସିକା ସମବାୟ ଚିନି କଳର ପୁନରୁଦ୍ଧାର ଓ ଆଧୁନିକୀକରଣ ପାଇଁ ରାଜ୍ୟ ସରକାର ନୂଆ ଉଦ୍ୟମ ଆରମ୍ଭ କରିଛି। ଏଥିପାଇଁ ଏକ ଟାସ୍କ ଫୋର୍ସ ଗଠନ କରାଯିବ, ଯାହାରେ କୃଷି, ଅର୍ଥ, ସମବାୟ, ଅବକାରୀ ଓ ଜଳ ସମ୍ପଦ ବିଭାଗର ବରିଷ୍ଠ ଅଧିକାରୀମାନେ ସଦସ୍ୟ ଭାବେ ଯୋଗ ଦେବେ। ମଙ୍ଗଳବାର ଲୋକସେବା ଭବନରେ ଅନୁଷ୍ଠିତ ବୈଠକରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଏହି ନିର୍ଦ୍ଦେଶ ଦେଇଛନ୍ତି।
ମୁଖ୍ୟମନ୍ତ୍ରୀ କହିଛନ୍ତି ଯେ ଆସିକା ଚିନି କଳର ପୁନରୁଦ୍ଧାର ଚାଷୀମାନଙ୍କର ଜୀବିକା ପାଇଁ ଗୁରୁତ୍ୱପୂର୍ଣ୍ଣ। ଏହି ଟାସ୍କ ଫୋର୍ସ ମହାରାଷ୍ଟ୍ର ଓ ଅନ୍ୟ ରାଜ୍ୟଗୁଡିକର ଚିନି ଶିଳ୍ପ ବ୍ୟବସ୍ଥାକୁ ପରୀକ୍ଷା କରି ସେଥିରୁ ଶ୍ରେଷ୍ଠ ପ୍ରକ୍ରିୟାଗୁଡ଼ିକୁ ଅନୁସରଣ କରିବ। ସେମାନଙ୍କ ମତାମତ ଆଧାରରେ ଏକ ଭଲ ଯୋଜନା ପ୍ରସ୍ତୁତ କରାଯିବ।
୧୯୫୬ରେ ଗଞ୍ଜାମରେ ସ୍ଥାପିତ ଆସିକା ସମବାୟ ଚିନି କଳ ୧୯୬୩ରୁ ଚିନି ଉତ୍ପାଦନ ଆରମ୍ଭ କରିଥିଲା। ପରେ ଏହାର କ୍ଷମତା ବୃଦ୍ଧି ହୋଇ ଅନ୍ୟାନ୍ୟ ପଦାର୍ଥ ମଧ୍ୟ ଉତ୍ପାଦନ କରାଯାଉଥିଲା। ତେବେ ବର୍ତ୍ତମାନ ଏହା ଲାଭରୁ ବହୁ ଦୂରେ ରହି ଚାଷୀମାନଙ୍କ ପାଇଁ ହାନିକର ସାବିତ ହୋଇଛି। ଏହିକଥାକୁ ଧ୍ୟାନରେ ରଖି ସରକାର ପୁନର୍ଦ୍ଧାର ଉଦ୍ୟମ ନେବାକୁ ପ୍ରସ୍ତୁତ।
ବୈଠକରେ ଉପ ମୁଖ୍ୟମନ୍ତ୍ରୀ କୃଷି ମନ୍ତ୍ରୀ କନକ ବର୍ଦ୍ଧନ ସିଂହଦେଓ, ପୂର୍ତ୍ତ ଓ ଅବକାରୀ ମନ୍ତ୍ରୀ ପୃଥ୍ବୀରାଜ ହରିଚନ୍ଦନ, ଶିଳ୍ପ ମନ୍ତ୍ରୀ ସମ୍ପଦ ଚନ୍ଦ୍ର ସ୍ବାଇଁ ଏବଂ ଆଉ କେତେକ ଉଚ୍ଚ ଅଧିକାରୀ ଉପସ୍ଥିତ ଥିଲେ। ସେମାନେ ନିଜର ମତାମତ ପ୍ରଦାନ କରି ଏହାର ପୁନର୍ଦ୍ଧାର ପ୍ରତି ସମର୍ଥନ ଦେଇଥିଲେ।
