ବ୍ରହ୍ମପୁର, ୯ା୧୨: ବ୍ରହ୍ମପୁର ସହରରେ ୨୦୧୦ ମସିହାରେ ଘଟିଥିବା ଧୀର ସାମଲ ହତ୍ୟାକାଣ୍ଡରେ ଦୀର୍ଘ ୧୪ ବର୍ଷର ବିଚାରଣା ପରେ ଗଞ୍ଜାମ ଜିଲା ଓ ଦୌରାଜଜ୍ ରୂପଶ୍ରୀ ଚୌଧୁରୀ ସୋମବାର ଚୂଡ଼ାନ୍ତ ରାୟ ଘୋଷଣା କରିଛନ୍ତି। ମାମଲାରେ ଆବଶ୍ୟକ ସାକ୍ଷ୍ୟ ପ୍ରମାଣ ଆଧାରରେ ୫ ଅଭିଯୁକ୍ତ—କାଳିଆ ସେଠୀ, ପି.କୃଷ୍ଣଚନ୍ଦ୍ର ପାତ୍ର, ପିଙ୍କୁ ପାତ୍ର, ସଞ୍ଜୟ ପ୍ରଧାନ, ଓ ସନିଆ ଗୌଡ଼—କୁ ଦୋଷୀ ସାବ୍ୟସ୍ତ କରାଯାଇ ଆଜୀବନ କାରାଦଣ୍ଡର ଦଣ୍ଡ ଦିଆଯାଇଛି।
୨୦୧୦ ମସିହାରେ, ପୂର୍ବ ଶତ୍ରୁତାକୁ ଆଧାର କରି ସଂଘବଦ୍ଧ ଭାବେ ଧୀର ସାମଲଙ୍କୁ ଖଣ୍ଡାରେ ହାଣି ହତ୍ୟା କରାଯାଇଥିଲା। ଏହାକୁ ନେଇ ଅଧିକାରୀମାନେ ୨୪ ଜଣ ସାକ୍ଷୀଙ୍କ ବୟାନ ରେକର୍ଡ କରିଥିଲେ। ସାକ୍ଷୀମାନଙ୍କ ମଧ୍ୟରୁ ଏକାଧିକଙ୍କ ବୟାନ ଓ ପ୍ରମାଣ ମଧ୍ୟ ଅଭିଯୁକ୍ତମାନଙ୍କ ଦୋଷ ସାବ୍ୟସ୍ତ କରିବାରେ ସାହାଯ୍ୟ କରିଥିଲା।
ଅଭିଯୁକ୍ତମାନେ ଜାମିନରେ ଥିବାବେଳେ ରାୟ ଜାରି ସମୟରେ କୋର୍ଟରେ ଉପସ୍ଥିତ ହୋଇଥିଲେ। ସାକ୍ଷ୍ୟ ପ୍ରମାଣ ଆଧାରରେ ଜିଲା ଜଜ୍ ସେମାନଙ୍କ ଦୋଷ ନିଶ୍ଚିତ କରି ଆଜୀବନ କାରାଦଣ୍ଡରେ ଦଣ୍ଡିତ କରିଛନ୍ତି। ସରକାରଙ୍କ ପକ୍ଷରୁ କ୍ୟାଡର ପବ୍ଲିକ ପ୍ରସିକ୍ୟୁଟର (ପିପି) ତ୍ରିଲୋଚନ ପରିଡ଼ା ଏହି ମାମଲାର ସମୁଚିତ ପରିଚାଳନା କରିଥିଲେ।
