କନ୍ଧମାଳ :୪/୧୨: କନ୍ଧମାଳ ଜିଲ୍ଲାର ଦାରିଙ୍ଗବାଡି ବ୍ଲକରେ ଦିବ୍ୟାଙ୍ଗମାନଙ୍କ ସ୍ଵାବଲମ୍ବନ ଏବଂ ଜୀବନଜୀବିକା ସୁଦୃଢ କରିବା ପାଇଁ ଗୁରୁତ୍ୱପୂର୍ଣ୍ଣ ପଦକ୍ଷେପ ଗ୍ରହଣ କରାଯାଇଛି। ବିଶ୍ୱ ଦିବ୍ୟାଙ୍ଗ ଦିବସର ଅବସରରେ କଲ୍ୟାଣ ମଣ୍ଡପରେ ଏକ ବିଶେଷ କର୍ମଶାଳା ଆୟୋଜିତ ହୋଇଥିଲା, ଯେଉଁଠାରେ ଦିବ୍ୟାଙ୍ଗମାନଙ୍କୁ ଘରେ ବସିବାରୋଜଗାର କରିବାର ଅବସର ଏବଂ ଭ୍ରାମ୍ୟମାଣ ବ୍ୟବସାୟ ପ୍ରତିଷ୍ଠା କରିବାର ଯୋଜନା ଉଦ୍ଘାଟିତ କରାଗଲା।
ଦାରିଙ୍ଗବାଡି ବ୍ଲକରେ ଥିବା ପ୍ରାୟ ୧୭୦୦ ଦିବ୍ୟାଙ୍ଗ ବ୍ୟକ୍ତି ମଧ୍ୟରୁ ପ୍ରଥମ ପର୍ଯ୍ୟାୟରେ ୫୦୦ ଦିବ୍ୟାଙ୍ଗକୁ ସ୍ଵାବଲମ୍ବନ ଦିଆଯିବ। ଏଥିପାଇଁ ସେମାନଙ୍କୁ ସୋଲାର ଚାଳିତ ଜେରକ୍ସ ମେସିନ, ଚୂନା ମିଲ, ଧାନ ଏବଂ ତେଲ ପେଡ଼ା ମିଲ, ପାମ୍ପଡ, ବଡି, ଦାନ୍ତକିଲି ମେସିନ ପ୍ରଦାନ କରିବାର ବ୍ୟବସ୍ଥା କରାଯାଇଛି।
ସବୁଜ ବୈଦ୍ୟ ସଂଗଠନର ସମ୍ପାଦକ ଦିନବନ୍ଧୁ ମହାରଣା କହିଛନ୍ତି, "ଏପରି ପଦକ୍ଷେପ ଗ୍ରହଣ ଫଳରେ ୧୦ ଜଣ ଦିବ୍ୟାଙ୍ଗ ମଧ୍ୟେ ସ୍ଵାବଲମ୍ବୀ ହୋଇଯାଇଛନ୍ତି। ଆହୁରି ୫୦ ଜଣ ଆବେଦନ କରିଛନ୍ତି, ଯାହା ନିମନ୍ତେ ପ୍ରକ୍ରିୟା ଚାଲିଛି।" ସେ ଅଧିକ କହିଛନ୍ତି ଯେ, ଏହି ପଦକ୍ଷେପର ମୂଳ ଉଦ୍ଦେଶ୍ୟ ହେଉଛି ଦିବ୍ୟାଙ୍ଗମାନଙ୍କୁ ସାମାଜିକ ଏବଂ ଆର୍ଥିକ ଦୃଢତା ଦିଆଇ ସେମାନଙ୍କୁ ଉନ୍ନତି ମାର୍ଗରେ ପ୍ରେରିତ କରିବା।
ଏହି କର୍ମଶାଳାରେ ମୁଖ୍ୟ ଅତିଥି ଭାବରେ ବିଡିଓ ପ୍ରୀତିରଞ୍ଜନ ରଥ କହିଛନ୍ତି, "ଦିବ୍ୟାଙ୍ଗମାନେ କୌଣସିଭାବରେ ଭିନ୍ନକ୍ଷମ ନୁହଁ। ସେମାନେ ସ୍ଵୟଂ ସକ୍ଷମ ଏବଂ ସମସ୍ତ କ୍ଷେତ୍ରରେ ଦକ୍ଷତା ଦେଖାଇ ପାରନ୍ତି।" ଅନ୍ୟାନ୍ୟ ଅତିଥିମାନେ ବ୍ଲକ ସାମାଜିକ ସୁରକ୍ଷା ଅଧିକାରୀ କ୍ଷେତୀଶ ପ୍ରିୟଦର୍ଶୀ ସାହୁ, ଏସବିଆଇ ଫିଲ୍ଡ ଅଫିସର ସନ୍ତୋଷ ସାହୁ ଏବଂ ସେଲକୋ ଫାଉଣ୍ଡେସନ ମୁଖ୍ୟ ଗୌତମ ପ୍ରଧାନ ବି ଏହାକୁ ସମର୍ଥନ କରିଛନ୍ତି।
ଏହି ପଦକ୍ଷେପ ଅଞ୍ଚଳରେ ଦିବ୍ୟାଙ୍ଗମାନଙ୍କ ଜୀବନରେ ଗୁରୁତ୍ୱପୂର୍ଣ୍ଣ ରୂପାନ୍ତର ଆଣିବାର ପ୍ରତ୍ୟାଶା ଜନମାଇଛି।
