ପୁରୀ, ୧୭ /୧୨:- ଆଜିଠାରୁ ଶ୍ରୀଜଗନ୍ନାଥ ମନ୍ଦିରର ରତ୍ନଭଣ୍ଡାରର ମରାମତି କାର୍ଯ୍ୟ ଆରମ୍ଭ କରିବାକୁ ଏଏସଆଇ ପ୍ରସ୍ତୁତ। ପ୍ରାଥମିକ ପର୍ଯ୍ୟାୟରେ ଭିତରର ଲୁହା ଭାରା ବନ୍ଧା କରି ଫାଟ ଓ ଚୂନ ଛଡାଇବା କାର୍ଯ୍ୟ କରାଯିବ। ଜିପିଆର ସର୍ଭେର ତଥ୍ୟ ଆଧାରରେ ରତ୍ନଭଣ୍ଡାରର ଫାଟ ଓ ଅନ୍ୟାନ୍ୟ ଖାମିଗୁଡ଼ିକର ମରାମତି କରାଯିବ।
ଦ୍ବିତୀୟ ଭୋଗ ମଣ୍ଡପରେ ଭୋଗ ଶେଷ ହେବା ପରେ ଦିନ ୧୨ଟା ୩୦ରୁ ସନ୍ଧ୍ୟା ୬ଟା ପର୍ଯ୍ୟନ୍ତ ପ୍ରତିଦିନ ପାଞ୍ଚଘଣ୍ଟା ମଧ୍ୟରେ ମରାମତି କାର୍ଯ୍ୟ ସମ୍ପାଦିତ ହେବ। ମହାପ୍ରଭୁଙ୍କ ନୀତିକାନ୍ତି କିମ୍ବା ଭକ୍ତଙ୍କ ଦର୍ଶନରେ କୌଣସି ବ୍ୟାଘାତ ସୃଷ୍ଟି ନକରି ଏହି କାର୍ଯ୍ୟ ସଂପାଦନ ହେବ।
ଫାଟ ଥିବା କାନ୍ଥରେ ନୂଆ ପଥର ବ୍ୟବହାର, ପୁରୁଣା ଲୁହା ବିମ୍ ସ୍ଥାନାନ୍ତର, ମୂଷା ଗାତ ହୋଇଥିବା ଚଟାଣ ମରାମତି ଏବଂ ଲୁହା ଭାରା ପ୍ରସ୍ତୁତି ଏହି ପ୍ରକଳ୍ପର ମୁଖ୍ୟ ଭାଗ।
ତିନିମାସ ମଧ୍ୟରେ ସମ୍ପୂର୍ଣ୍ଣ ମରାମତି କାର୍ଯ୍ୟ ଶେଷ କରିବା ଲକ୍ଷ୍ୟରେ ଏଏସଆଇର ସ୍ବତନ୍ତ୍ର ଟିମ୍ ଚାଲୁ କାର୍ଯ୍ୟକ୍ରମକୁ ଶିଘ୍ରତା ଦେବାକୁ ଥିବା ବେଳେ ଅଧିକ ମାନବସମ୍ବଳ ଯୋଗାଇ ମରାମତି ଚାଲିବ।
ଏହା ନେଇ ଭକ୍ତମାନଙ୍କ ମଧ୍ୟରେ ଏକ ଭଲ ପ୍ରତିକ୍ରିୟା ଦେଖାଯାଇଛି। ମହାପ୍ରଭୁଙ୍କ ଆରାଧନାରେ କୌଣସି ବାଧା ବ୍ୟତୀତ ରତ୍ନଭଣ୍ଡାର ମରାମତି କାର୍ଯ୍ୟ ତ୍ବରାନ୍ବିତ ଭାବେ ସଂପାଦନ ହେବ।
