ଭୁବନେଶ୍ୱର, ୧୬ /୧ :ଓଡ଼ିଶାରେ ଜାତୀୟ ଶିକ୍ଷା ନୀତି (ଏନଇପି) ୨୦୨୦କୁ ଗୁରୁତ୍ୱ ଦେଇ ରାଜ୍ୟ ସରକାର ଏକ ଅଭିନବ ପଦକ୍ଷେପ ଗ୍ରହଣ କରିଛନ୍ତି। ଏହି ପଦକ୍ଷେପରେ ଏନଇପିକୁ କାର୍ଯ୍ୟକାରୀ କରିବା ପାଇଁ ଏକ ୧୭ ଜଣ ସଦସ୍ୟ ବିଶିଷ୍ଟ କମିଟି ଗଠନ କରାଯାଇଛି, ଯାହାର ଅଧ୍ୟକ୍ଷ ଭାବରେ ପ୍ରଫେସର ନିତ୍ୟାନନ୍ଦ ପ୍ରଧାନଙ୍କୁ ନିଯୁକ୍ତ କରାଯାଇଛି। ଗଣଶିକ୍ଷା ବିଭାଗ ପକ୍ଷରୁ ଏହା ସଂପର୍କିତ ବିଜ୍ଞପ୍ତି ପ୍ରକାଶ କରାଯାଇଛି। ରାଜ୍ୟ ସରକାର ଘୋଷଣା କରିଛନ୍ତି ଯେ ଆସନ୍ତା ଶିକ୍ଷା ବର୍ଷରୁ ଏନଇପି ୨୦୨୦କୁ ସ୍କୁଲ ସ୍ତରରେ ଲାଗୁ କରାଯିବ। ଏହା ରାଜ୍ୟରେ ଏକ ଐତିହାସିକ ପଦକ୍ଷେପ ଭାବରେ ବିବେଚିତ ହେଉଛି, ଯାହା ଦ୍ୱାରା ପ୍ରାଥମିକ ସ୍ତରରେ ପିଲାମାନଙ୍କ ଶିକ୍ଷା ଭିତ୍ତି ସୁଦୃଢ଼ ହେବା ସହ ଶିକ୍ଷା ବ୍ୟବସ୍ଥାକୁ ଆଧୁନିକତା ଆଣିବାକୁ ଲକ୍ଷ୍ୟ ରଖାଯାଇଛି। ଏହି ନୀତିରେ ଓଡ଼ିଆ ଭାଷା, କଳା, ସଂସ୍କୃତି ଓ ଆଞ୍ଚଳିକ ବିଷୟବସ୍ତୁକୁ ବିଶେଷ ଗୁରୁତ୍ୱ ଦିଆଯାଇଛି। ଅନ୍ୟଦିଗରେ ଧନ୍ଦାମୂଳକ ଶିକ୍ଷା ଓ ପ୍ରାଥମିକ ଶିକ୍ଷାକୁ ଉନ୍ନତ କରିବା ପାଇଁ ପ୍ରତି ପଂଚାୟତରେ ଗୋଦାବରୀଶ ଆଦର୍ଶ ପ୍ରାଥମିକ ବିଦ୍ୟାଳୟ ସ୍ଥାପନ କରାଯିବ। ମାଧୋ ସିଂ ହାତଖର୍ଚ୍ଚ ଯୋଜନା ଦ୍ୱାରା ନବମ ଓ ଏକାଦଶ ଶ୍ରେଣୀରେ ନାମ ଲେଖାଇଥିବା ଛାତ୍ରଛାତ୍ରୀଙ୍କ ଆକାଉଣ୍ଟରେ ଟଙ୍କା ଅଂଶ ଅନ୍ତର୍ଭୁକ୍ତ ହେବ। ଏହି ଯୋଜନା ପାଇଁ ରାଜ୍ୟ ସରକାର ୧୫୬ କୋଟି ଟଙ୍କା ବ୍ୟୟ ବରାଦ କରିଛି। ପିଏମ ଶ୍ରୀ ଯୋଜନା ଅଧିନେ ୩୫୦ ସ୍କୁଲକୁ ଉନ୍ନତ ସାଜାଯାଇଛି। କେନ୍ଦ୍ର ସରକାର ସହ ୧୦୦ ଏମଓୟୁ ସ୍ୱାକ୍ଷର ହୋଇଥିବା ବେଳେ ଆହୁରି ସ୍କୁଲ ସାମିଲ କରିବା ପାଇଁ ଚେଷ୍ଟା ଚାଲିଛି। ଏହି ଯୋଜନା ଦ୍ୱାରା ଶିକ୍ଷାର ଗୁଣତ୍ମକ ଉନ୍ନତି ଆଶା କରାଯାଉଛି। ଏନଇପି ୨୦୨୦ର କାର୍ଯ୍ୟାନ୍ବୟ ପାଇଁ ଜାନୁଆରୀ ୨୧ରୁ ୨୩ ତାରିଖ ପର୍ଯ୍ୟନ୍ତ ଏକ ବିଶେଷ କର୍ମଶାଳା ଆୟୋଜନ କରାଯିବ। ରାଜ୍ୟ ସରକାରଙ୍କ ଏହି ଉଦ୍ୟମ ଏକ ସୁଦୂରପ୍ରସାରୀ ପରିବର୍ତ୍ତନର ଆରମ୍ଭକୁ ସୂଚିତ କରେ।
