ବିଶ୍ରା, ୨୩ /୩ : ଓଡ଼ିଶା-ଝାଡ଼ଖଣ୍ଡ ସୀମାନ୍ତରେ ନକ୍ସଲମାନଙ୍କ ଆତଙ୍କ ଏବେ ମଧ୍ୟ ଜାରି ରହିଛି। ଶନିବାର ସରଣ୍ଡା ଜଙ୍ଗଲର ମାରାଙ୍ଗପୋଙ୍ଗା ଅଞ୍ଚଳରେ ଚଲିଥିବା ନକ୍ସଲ ବିରୋଧୀ ଅଭିଯାନ ମଧ୍ୟରେ ଅଚାନକ ଶକ୍ତିଶାଳୀ ଲ୍ୟାଣ୍ଡମାଇନ୍ ବିସ୍ଫୋରଣ ଘଟିଥିଲା। ଏହି ହମଲାରେ ସିଆର୍ପିଏଫ୍ ୧୯୭ ବାଟାଲିୟନ୍ର ସବ୍ଇନ୍ସ୍ପେକ୍ଟର ସୁନୀଲ କୁମାର ମଣ୍ଡଳ ସହିଦ ହୋଇଥିବା ବେଳେ ଯବାନ ପାର୍ଥ ପ୍ରତୀମ ଦେ' ଗୁରୁତର ଆହତ ହୋଇଛନ୍ତି।
ହଠାତ ଘଟିଥିବା ଏହି ବିସ୍ଫୋରଣର ତିବ୍ରତା ଏତେ ଅଧିକ ଥିଲା ଯେ ଦୁଇ ଜଣ ଜବାନ ଗୁରୁତର ଭାବରେ ଆହତ ହୋଇଥିଲେ। ତୁରନ୍ତ ଛୋଟାନାଗପୁର ଡାକ୍ତରଖାନାରେ ପ୍ରାଥମିକ ଚିକିତ୍ସା କରାଯିବା ପରେ ଉଭୟଙ୍କୁ ହେଲିକପ୍ଟର ଯୋଗେ ରାଞ୍ଚି ଚିକିତ୍ସା ପାଇଁ ପଠାଯାଇଥିଲା। କିନ୍ତୁ ଅପସୋସର ବିଷୟ ଯେ ସୁନୀଲ କୁମାର ମଣ୍ଡଳ ଚିକିତ୍ସାଧୀନ ଅବସ୍ଥାରେ ଅଂତିମ ଶ୍ଵାସ ନେଇଥିଲେ।
ଏହି ଘଟଣା ସରଣ୍ଡା ଅଞ୍ଚଳରେ ନକ୍ସଲମାନଙ୍କ ବଢ଼ୁଥିବା ସକ୍ରିୟତାକୁ ପୁଣିଥରେ ସ୍ପଷ୍ଟ କରିଦେଇଛି। ମାତ୍ର ୪ ଦିନ ତଳେ ଏହି ଅଞ୍ଚଳରେ ଆଉ ଏକ ଲ୍ୟାଣ୍ଡମାଇନ୍ ବିସ୍ଫୋରଣ ହୋଇଥିଲା, ଯେଉଁଥିରେ ଜଣେ ସିଆର୍ପିଏଫ୍ ଯବାନ ଗୁରୁତର ଆହତ ହୋଇଥିଲେ। ଏଥିସହ ଏହି ନୂଆ ହମଲା ଦେଖାଇଦେଉଛି ଯେ ନକ୍ସଲମାନେ ଏବେ ସୁରକ୍ଷା ବାହିନୀକୁ ଟାର୍ଗେଟ୍ କରି ଅଭିଯାନ ଚଲାଇବାକୁ ଚେଷ୍ଟା କରୁଛନ୍ତି।
ନକ୍ସଲମାନଙ୍କ ଏହି ପ୍ରଚଣ୍ଡ ହମଲାର ପରେ ସୁରକ୍ଷା ବାହିନୀ ଅଞ୍ଚଳରେ ଆଉ ଅଧିକ ସକ୍ରିୟ ହୋଇଛି। ନକ୍ସଲ ଅଭିଯାନକୁ ଆରମ୍ଭ କରି ଜଙ୍ଗଲରେ ଚେନ ଅପରେସନ୍ ଚଲାଯାଉଛି। ସୁରକ୍ଷା ବାହିନୀ ପକ୍ଷରୁ ଏହି ନକ୍ସଲ ଆତଙ୍କବାଦକୁ ଦମନ କରିବାକୁ ନୂଆ ଯୋଜନା ଓ ଅଭିଯାନ ଗଠନ କରାଯାଇଛି।
ସୁନୀଲ କୁମାର ମଣ୍ଡଳଙ୍କ ବଳିଦାନ ଅମର ରହିବ! ଏହି ନକ୍ସଲ ହମଲା ଏବଂ ଆଗାମୀ ପଦକ୍ଷେପ ନେଇ ସରକାର କଣ ନୂଆ କାର୍ଯ୍ୟକ୍ରମ ଗ୍ରହଣ କରିବ, ସେଥିପାଇଁ ସମସ୍ତଙ୍କ ଦୃଷ୍ଟି ଏହି ଘଟଣା ଉପରେ ରହିଛି।
