ଭୁବନେଶ୍ୱର, ୧୧।୩ : – ରାଜ୍ୟରେ ଭାଜପା ସରକାର ଗଠିତ ହୋଇ ପ୍ରାୟ ୯ ମାସ ବିତି ଯାଇଛି, କିନ୍ତୁ ଏପର୍ଯ୍ୟନ୍ତ ସମସ୍ତ ବିଧାୟକଙ୍କୁ ସରକାରୀ କ୍ୱାର୍ଟର୍ସ ଉପଲବ୍ଧ ହୋଇପାରି ନାହିଁ। ଅନେକ ନୂଆ ବିଧାୟକ ତାଙ୍କ ନିଯୁକ୍ତି ପରେ ମଧ୍ୟ ଘର ପାଇଁ ଅପେକ୍ଷାରେ ଅଛନ୍ତି। ଏକ ଉଚ୍ଚ ସ୍ତରୀୟ ସୂଚନା ଅନୁଯାୟୀ, ଅନେକ ବିଧାୟକ ଏପର୍ଯ୍ୟନ୍ତ ରାଜ୍ୟ ଅତିଥି ଭବନ କିମ୍ବା ଅନ୍ୟ ସ୍ଥାନରେ ଅସ୍ଥାୟୀ ଭାବରେ ବସୋବାସ କରୁଛନ୍ତି।ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ସୋମବାର ବିଧାନସଭାରେ ଏକ ଲିଖିତ ପ୍ରଶ୍ନର ଉତ୍ତରରେ ସୂଚନା ଦେଇଥିଲେ ଯେ, ୧୦ ଜଣ ବିଧାୟକ ସରକାରୀ କ୍ୱାର୍ଟର୍ସ ପାଇଁ ଆବେଦନ କରିଛନ୍ତି। ଏହି ମଧ୍ୟରୁ ୬ ଜଣ ବିଧାୟକ ଏପର୍ଯ୍ୟନ୍ତ ନିଜ କ୍ୱାର୍ଟର୍ସ ଅଧିକାରଭୁକ୍ତ କରିପାରି ନାହାନ୍ତି। ଏହା ସହିତ ୭ ଜଣ ବିଧାୟକ ତାଙ୍କ ଉପଲବ୍ଧ କ୍ୱାର୍ଟର୍ସ ପରିବର୍ତ୍ତନ ପାଇଁ ଆବେଦନ କରିଛନ୍ତି।ପ୍ରଶାସନିକ ଅସୁବିଧା ଏବଂ ପୂର୍ବତନ ବିଧାୟକମାନେ ଏପର୍ଯ୍ୟନ୍ତ ସରକାରୀ ବାସଭବନ ଛାଡ଼ି ନ ଥିବାରୁ ଏହି ସମସ୍ୟା ସୃଷ୍ଟି ହୋଇଛି। ମୁଖ୍ୟମନ୍ତ୍ରୀ ଏହି ଅବସ୍ଥାର ସମାଧାନ ପାଇଁ ପ୍ରୟାସ ଜାରି ରଖିବେ ବୋଲି ସୂଚନା ଦେଇଛନ୍ତି।
