ରାଉରକେଲା, ୧୨ /୪ : ମାନବ ସମ୍ପର୍କରେ ବିଶ୍ୱାସ ଓ ଆତ୍ମୀୟତା ବେଳେବେଳେ କିପରି ବିଷାଣୁ ରୂପ ନେଇପାରେ, ତାହା ଦେଖିବାକୁ ମିଳିଛି ସୁନ୍ଦରଗଡ଼ ଜିଲ୍ଲା ବଣାଇ ଉପଖଣ୍ଡ ଅଧୀନ ମହୁଲପଦା ଥାନା ଅନ୍ତର୍ଗତ ଲୁଙ୍ଗା ଗାଁରେ। ଏଠି ଏକ ଅଭାବନୀୟ ଘଟଣା ରେ, ଜଣେ ସାନଭାଇ ଧନୁ-ତୀର ଦ୍ୱାରା ବଡ଼ଭାଇଙ୍କ ଜୀବନ ନେଇଗଲେ। ଏହାପରେ ଅଭିଯୁକ୍ତ ଭାଇ ଆତ୍ମଗ୍ଲାନି ଓ ଭୟ ଯୋଗୁଁ ବିଷପାନ କରି ଦେଲେ।ମୃତ ଜଣେ ଗାମିୟା ମୁଣ୍ଡା (୫୨) ବୋଲି ପରିଚୟ ମିଳିଛି, ଓ ଅଭିଯୁକ୍ତ ସାନଭାଇ ସନାତନ ମୁଣ୍ଡା (୪୬) ବର୍ତ୍ତମାନ ଗୁରୁତର ଅବସ୍ଥାରେ ଚିକିତ୍ସାଧୀନ। ସୂଚନା ଅନୁସାରେ, ଦୁଇ ଭାଇଙ୍କ ମଧ୍ୟରେ ପାରିବାରିକ ଅଶାନ୍ତି ଏକ ଦୀର୍ଘ ଦିନର ବିରୋଧ ରୂପ ନେଇଥିଲା। ଶନିବାର ଦିନ ତାହା ଚୂଡ଼ାନ୍ତ ସୀମାକୁ ପହଞ୍ଚିଥିଲା। ସେହି ଦିନ ଦୁଇଜଣଙ୍କ ମଧ୍ୟରେ ହସ୍ତାହସ୍ତି ଓ ଯୁକ୍ତିତର୍କ ହେବା ପରେ, ରାଗ ଓ ଉମେଶା ଅନ୍ଧକାର କରିଦେଲା ସନାତନଙ୍କୁ। ଘର ଭିତରୁ ଧନୁ ଓ ତୀର ଆଣି, ସେ ଗାମିୟାଙ୍କୁ ଲକ୍ଷ୍ୟ କରି ବିନ୍ଧି ଦେଲେ। ତତ୍କ୍ଷଣାତ୍ ଗାମିୟା ତଳେ ଟଳିପଡ଼ିଲେ, ଓ ଘଟଣାସ୍ଥଳରେ ମୃତ୍ୟୁ ହୋଇଗଲା ।
ଘଟଣା ପରେ ଅସ୍ଥିର ମନସ୍ଥିତି ଓ ଭୟରେ ଥିବା ସନାତନ ବିଷପାନ କରିଥିଲେ। ପରିବାର ଓ ଗ୍ରାମବାସୀ ତାଙ୍କୁ ଉଦ୍ଧାର କରି ବଣାଇ ଉପଖଣ୍ଡ ଡାକ୍ତରଖାନାକୁ ନେଇଯାଇଛନ୍ତି, ଯେଉଁଠାରେ ସେ ଚିକିତ୍ସାଧୀନ ଅଛନ୍ତି।ଘଟଣା ସୂଚନା ପାଇ ମହୁଲପଦା ଥାନା ପୁଲିସ ଘଟଣାସ୍ଥଳକୁ ଯାଇ ମୃତଦେହକୁ ଜବତ କରି, ପୋଷ୍ଟମର୍ଟମ ପାଇଁ ପଠାଇଛି। ଏକ ହତ୍ୟା ମାମଲା ରୁଜୁ ହୋଇଛି ଓ ଅଭିଯୁକ୍ତ ସୁସ୍ଥ ହେବା ପରେ ଆଇନଗତ କାର୍ଯ୍ୟାନୁଷ୍ଠାନ ନିଆଯିବ ବୋଲି ପୁଲିସ ସୂଚନା ଦେଇଛି।
