ନୂଆପଡ଼ା, ୨୦/୪ : ବନ୍ୟପ୍ରାଣୀ ଶିକାରକୁ ନେଇ ଓଡ଼ିଶାରେ ଯେଉଁ ସତର୍କତା ନେଉଥିବା ଦାବି କରାଯାଉଛି, ତାହାକୁ ଉଲ୍ଟାଇଦେଲା ନୂଆପଡ଼ାର ଏକ ଅପ୍ରତ୍ୟାଶିତ ଘଟଣା। ବାରହା ଶିକାର ଓ ତାହାର ମାଂସ ବିକ୍ରି ଅଭିଯୋଗରେ ଜଣେ ମୁଖ୍ୟ ଅଭିଯୁକ୍ତ ଓ ମାଂସ କିଣି ରାନ୍ଧି ଖାଉଥିବା ଅଭିଯୋଗରେ ଦୁଇ ଜଣଙ୍କୁ କୋମନା ବନାଞ୍ଚଳ ଅଧିକାରୀ ଦେବଦତ୍ତ ସୁତାର ନେତୃତ୍ୱରେ ଚଢ଼ଉ କରି ଗିରଫ କରାଯାଇଛି।ଖବର ଅନୁଯାୟୀ, ଖଲିଆ ମୁଣ୍ଡା ନାମକ ଗ୍ରାମବାସୀ ଅନ୍ତରାମ ମାଝୀ (୪୦) ବୋମା ଭିଡି ଜଙ୍ଗଲରେ ବିସ୍ଫୋରକ ଉପକରଣ ବ୍ୟବହାର କରି ବାରହା ଶିକାର କରିଥିଲେ। ଶିକାର ପରେ ତାହାକୁ କାଟି ମାଂସ ବିକ୍ରି କରାଯାଇଥିବା ଓ ଅନେକ ଲୋକ ଏହି ମାଂସ କିଣି ରାନ୍ଧି ଖାଇଥିବା ତଥ୍ୟ ମିଳିଛି। ଚଢ଼ଉ ପରେ ୬ଟି ଜୀବନ୍ତ ବୋମା, ବାରହା ଫାସ, ୫୫ଟି ଝିଙ୍କ କଣ୍ଟା ଓ ରକ୍ତ ଭିଜା ଟାଙ୍ଗିଆ ଜବତ କରାଯାଇଛି।ମୃତ ବାରହାର ମାଂସ ଓୟୁଏଟି ପରୀକ୍ଷା ପାଇଁ ପଠାଯାଇଛି। ଯେଉଁଠାରୁ ବିସ୍ଫୋରକ ଆସୁଛି, କିଏ ଏହି ଚେନ୍ ଚାଲାଉଛି – ଏହାର ଗଭୀର ତଦନ୍ତ ଆବଶ୍ୟକ ବୋଲି ବନ୍ୟପ୍ରାଣୀ ପ୍ରେମୀମାନେ ମତ ପ୍ରକାଶ କରିଛନ୍ତି।ଦିନକୁ ଦିନ ଜଙ୍ଗଲ ଅଞ୍ଚଳରେ ଜନ୍ତୁ ଶିକାର ଓ ବନ୍ୟପ୍ରାଣୀ ମାଂସର ବେଆଇନ ବ୍ୟବସାୟ ଯେପରି ଧୀରେ ଧୀରେ ଜାଳ ବିସ୍ତାର କରୁଛି, ତାହା ପ୍ରତି ବନ ବିଭାଗର ସକ୍ରିୟ ନଜର ଓ ମଜବୁତ ପଦକ୍ଷେପ ଅତ୍ୟନ୍ତ ଆବଶ୍ୟକ। ଏହି ଘଟଣା ପୁଣିଥରେ ସେହି ପ୍ରଶ୍ନ ଉଠାଇଛି – ଜନ୍ତୁ ଶିକାର ବିରୋଧରେ କୌଣସି ଦୃଢ଼ ରଣନୀତି ଆଛି କି?
ଅଭିଯୁକ୍ତମାନଙ୍କୁ କୋର୍ଟ ଚାଲାଣ କରାଯିବ ବୋଲି ବନାଞ୍ଚଳ ଅଧିକାରୀ ସୂଚନା ଦେଇଛନ୍ତି, ଯେଉଁଠାରେ ଏକ ଅଭିଯୁକ୍ତ ଏପର୍ଯ୍ୟନ୍ତ ଫେରାର ଅଛନ୍ତି। ବନ୍ୟପ୍ରାଣୀ ରକ୍ଷା ଓ ଆଇନର ପ୍ରତି ଏହି ଚିନ୍ତାଜନକ ସ୍ଥିତି ଆଉ କେତେ ଦିନ ଦେଖିବାକୁ ପଡିବ?
