ନାମଯଜ୍ଞ ମଧ୍ୟରେ ମୃତ୍ୟୁର ତାଣ୍ଡବ, ବୃଦ୍ଧ କୁ ପିଟିପିଟି ହତ୍ୟା

କଣ୍ଟାବାଞ୍ଜି, ୧୩ / ୪ :  – ଶାନ୍ତି, ଭକ୍ତି ଓ ଧାର୍ମିକତାର ପରିବେଶ ମଧ୍ୟରେ ବିସ୍ଫୋରଣ ଘଟିଲା ବଲାଙ୍ଗିର ଜିଲ୍ଲାର କର୍ଲାପିଟା ଗାଁରେ। ଷୋହଳ ପ୍ରହରୀ ନାମଯଜ୍ଞ ଚାଲିଥିବା ବେଳେ, ପୂର୍ବ ଶତ୍ରୁତା ଅପ୍ରତ୍ୟାଶିତ ଭୟଙ୍କର ରୂପ ନେଇ ଆସି, ଏକ ବୃଦ୍ଧଙ୍କୁ ଠେଙ୍ଗାରେ ପିଟି ହତ୍ୟା କରାଯାଇଛି। ଘଟଣାର କେନ୍ଦ୍ରବିନ୍ଦୁ — ବିଭୀଷଣ ଧରୁଆ। ଧାର୍ମିକ ଅନୁଷ୍ଠାନ ଦେଖୁଥିବା ସମୟରେ, ତାଙ୍କ ଉପରେ ଅତର୍କିତ ଭାବେ ଆକ୍ରମଣ କରିଛନ୍ତି ପୁରନ୍ଦର ଧରୁଆ, ଯିଏ କି ସମ୍ପ୍ରତି ଜେଲ୍ ରୁ ଫେରିଥିଲେ। ଏହି ଆକ୍ରମଣ ଅତ୍ୟନ୍ତ ନିର୍ମମ ଓ ଅମାନବିକ ଥିଲା। ଘଟଣାସ୍ଥଳରେ ବିଭୀଷଣଙ୍କ ମୃତ୍ୟୁ ଘଟିଥିଲା। ଘଟଣା ପରେ ମୁରିବାହାଲ ପୋଲିସ, କଣ୍ଟାବାଞ୍ଜି ଏସଡ଼ିପିଓ ଓ ସାଇଣ୍ଟିଫିକ ଟିମ୍ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି। ଆକ୍ରମଣକାରୀ ପୁରନ୍ଦରକୁ ପୋଲିସ ଗିରଫ କରିଛି। ପ୍ରାଥମିକ ତଦନ୍ତରୁ ଜଣାପଡ଼ିଛି ଯେ ଦୁଇ ଲୋକଙ୍କ ମଧ୍ୟରେ ପୂର୍ବରୁ ବିବାଦ ଓ ମାରପିଟ ହେଉଥିଲା, ଏବଂ ଏହି ପୁରୁଣା ଦ୍ୱେଷ ହତ୍ୟାର ପରିଣତି ନେଇଛି।